Colossians 3

Fye La Eshe Bo Shi Nabye

1Shi fye ɓei bwa wye-wyei n jesun, esa n Kristi ɓei laka n efi nyi, fye la awyetu, nwo nyabwa yakwo, n na gmadayi eshe nya, aba n wo sase tu lo n Shekwoyi bwaizhebwa, n she n mwa-mwai n ikoyi nyi. 2Fye zhin aɓo nubo nu n ɓa lo eshe, fyeto la esa n mwa n na anyiɓonubo zhin yin. 3Anyiɓo to fi fye pwan, ngye oza n wo lafi. Ofye wyewyeyi hin-hin lo n eshe n Kristi yi ɓedo n Shekwoyi. 4Esa n Kristi nwo zhin eyi wye-wyeyi hin-hin, wa jezeɓe fye ɓei bmiya na fyei bwa owo mwa-mwa.

5Fyeku aɓo anukwoyi anyi nya ya, fye ku aɓo anukwoyi wu n ɓa fi n fyemi nyi, fye la abwa kun n na anagbai zhi, cegye, shakpe n na aɓo pwawo vinyikwo nya yi, fyeto gyi anya manayi anyi nya wyen, gama deye kwo zhin shangba nu. 6Shekwoyi minagyi tulo n na aza, n ɓa zhin aɓeye pya nyi. 7Fye ɓei zhin fyei zhin ɓa esa n fye ɓei zhin anyi nya nu nyi. 8Ama nsaiye, esa la si n fye ɓa kma anya gye ya, fya kma jekpe kwo-kwoyi minagyi nya ya, nbmi-bmiyi, akmi, na ɓeda kasayi.

9Fye to ce akata fi ajen, ofye wyewyeyi kwo-kwoyi nu ɓei zhin kwoi zhin lonu, nsaiye kwo la fi. 10Nsaiye fye se ase woi-woi nu, kwoi tu ɓemana mwi ci-ci, kwoi zhin atna kwa wu ngye Kristi, n wa zhin wyewyeyi woi-woi n efye mi nyi. 11Dna n wye-wyeyi woi-woi ye, oza ekni, ko ilimi, ko oza masei kwo to zhin nyaho nun, anya gye vinya to zhin nyaho nun, ndei oza n Kristi yi lo okwo nu zhin nyaho, woi gni n na aza ɓonu vinya.

12Tunda Shekwoyi la fye kni, n wa ga fye wye-wyeyi woi-woi nyi, ntu n wo ye-ye lolo yi ɓo n fye aba, fye tu sun-sun-gye mwi, n bugbafuyi n na azaye n cei. Fye to damu n ɓei n ɓa ɓa dan, ama fye sin wahala dna n na atnazhin n hakuri yi. 13Fye zhin peceye fyei zhin shiri fya zhin aza gafara. Fye to shi za n fye min, fye pa ge Dagayi n ku gafara zhin fye, ntucenu tilas fya zhin azaje gafara.

14Nkwo sin vinya, fye fa ye-ye kwa gyi be n ofye awye-wyeyi nlonu ikklisiya vinya ɓa sase nbugbai gmanyi. 15Fye fa bugbafu n kwo gmi n Kristi aba nyi, kwa dna n fye abugbami cici, gama efye tnu-tnu nyi n fye sai n fye zhin owo nayi aganyi. Fyei zhin godiya cici.

16Fye pa enya ɓo n Kristi ɓei wu nyi, fye fa owo aɓeda kwa dna n fye abugba mi, kwa ce fye. Fye wu fye azaje, fyei kwo ɓa n zabura yi, n anyi zafun nyayi, fyei kwo anyi ga Dagayi n bugba dayi. 17Enya vinya n fya zhin kwo fya da, fye fa kwa ze wakili Dagayi Yesu nya, fya ɓe n gnisun n woi n Shekwoyi Dada abye fya zhin wo godiya.

Jedoɓe Manayi

18Ofye anyikwoza, fye vi efye aɓa ɓo gama nyanu n Shekwoyi wa zhin shiri ga fye. 19Ofye azanugbayi tila fya ye n fye anyikwozayi, fyei wuɓa alheri, to fya gyi minagyi nɓai, ko fya wun bugba n ɓa yin.

20Ofye aɓi tilas fya vi ofye azakwoyi ɓo–efye adada n efye ayai–gama deye kwo da Shekwoyi agma. 21Adada, fye to wun efye aɓi bugba, har bugba bma ɓa ya m, ɓa fa kukari zhi ɓon.

22Efye afyenu tilas fya vi efye adagayi anyi nya ɓo to fya zhin atna fya zhin oɓo n kwo daɓa ɓai zhi nu gmanyin, ama fye vi ɓa ɓo cici, ntu n fye Dagayi ye-ye ɓo n fye n cei pma fya dawo bugba nyi. 23Fye zhin tnu-tnu n kalayi n bugba bui-buyi n esa yi vinya, n gye fye zhin Dagayi tnu-tnu nu to ge ngye efye adagayi nyan. 24Fyei pa ge, Dagayi Kristi nu ɓa gba fye ta, woi ga fye anya vinya n wo cei. Owo nu nfye zhin wo tnutnu. 25Nfye to la fyehin yin, wo ɓei gbafye n nya yi n fye to n cei pman, gama wo ta kni oza kni-kni n na awa daban, n oza ɓa laka ai dawon.